Zawhna : Electoral Roll-ah ka inthun duh a, engtia dil tur nge ?
Chhanna :Electoral Roll-a inthun tur chuan Mahni awmna veng Booth Level Officer(BLO) hnenah emaw, Election Branch atangin emaw Form 6 lak chhuah a, dah khah ngaite tihfel hnuah document thil tel ngaite form-ah thil telin Booth Level Officer hnenah thehluh tur a ni. Form hi a duh tan Election Commission of India website atangin a download theih bawk.
Zawhna : Tute nge Electoral Roll-a inziak lut thei ?
Chhanna : India khua leh tui, Sawrkawrin hun bithliah a siam a kum 18 tlingte tan Electoral Roll-ah inziah luh theih a ni.
Zawhna : Ka voter ID card ka ti bo a, a dang a siam leh theih em ? Chumi atan chuan document ngaite a awm em?
Chhanna :Voter ID card tibo chuan mahni awmna veng Booth Level Officer hnenah hriattir tur a ni. BLO hriatpuina lehkha kengin District Election Office, Election Branch-ah a dang siamtir leh theih a ni. Siamthatna atan Rs 25 pek a ngai.
Zawhna : Ka Voter ID card a kang a, ka pa ta a thler chhe bawk a, A dang a siam leh theih em ? Engtin nge ka tih dawn?
Chhanna :Voter ID hi tihkan palh emaw tihchhiat palh emaw anih chuan mahni awmna veng Booth Level Officer hnenah hriattir tur a ni a, BLO hriatpuina lehkha kengin District Election Office, Election Branch-ah a dang siamtir leh theih a ni.
Zawhna : Ka Voter ID card a ka pian hun inziak hi a dik lo a, ka nu ID card a mi hi a hming a dik lo bawk a, kan document dangte nen a inmil lo a, siamthat dan a awm em ?
Chhanna :Voter ID card-ah mahni chanchin dik lo a awm anih chuan mahni awmna veng Booth Level Officer hnenah emaw District Election Office-ah emaw kal a, Electoral Roll-ah inenfiah tur a ni. Electoral Roll bu a mahni chanchin dik si voter ID card a dik lo anih chuan District Election Office, Election Branch-ah Voter ID thar siam tir tur a ni a, pawisa chawi a ngai lo. Voter ID card dik lo kha thehluh nghal tur a ni. Electoral Roll leh voter ID card a mahni chanchin inziak a dik lo ve ve anih chuan form 8 BLO hnen atangin lachhuak la, dah khah ngaite i dah khah hnuah particular dik lo lai tihdik tur tichiangtu document thil telin BLO hnenah i thehlut dawn nia.
Zawhna : Electoral Roll-ah hmun hnihah ka hming a awm a, vote ka thlak ve ve thei em ?
Chhanna :Thei lo. Mi pakhat tan hmun khatah bak vote neih theih anih loh avangin Electoral roll a hmun hniha awm hi dan phal loh a ni.
Zawhna : Electoral Roll chungchangah hriat duh ka nei a, khawia zawh tur nge ?
Chhanna :Electoral Roll-chungchanga hriatfiah leh zawh duh nei chuan BLO emaw, bialtu ERO/AERO emaw, Election Branch, DC Office-ah emaw engtiklai pawhin zawhfiah theih a ni.
Zawhna : Electoral Roll-a luh, paih leh siamthat dilna form hi khawia tanga lak tur nge ? Pawisa chawi a ngai em ?
Chhanna : Electoral Roll-a luh, paih leh siamthat dilna form hi mahni awmna veng BLO hnen atangin leh District Election Office/Election Branch atangin lakchhuah theih a ni. Pawisa chawi a ngai lo. Tin, Election Commission of India website atangin a download theih bawk.
Zawhna : Electoral Roll-ah ka hming a awm leh awm loh ka hre duh a, khawi atangin nge ka hriat theih ang ?
Chhanna : Electoral Roll-a mahni hming awm leh awm loh hi BLO emaw AERO/ERO emaw, District Election Office/Election Branch atangin emaw hriat theih a ni. Election Commission of India website/National Voters Service Portal atangin mahni hming a awm leh awm loh a en theih bawk.
Zawhna : Electoral Roll-a inziah luh hi engtikah nge a dil theih ?
Chhanna : Election Commission of India-in kum tin a nawlpui tan Electoral Roll Summary Revision a buatsaih thin a. Hemi hun chhung hian dil theih a ni. Tin, hemi hun chhunga inziak lut hman lote tan BLO kaltlangin dilna a thehluh theih tho bawk a ni.
Zawhna : Sipaiah ka tang a, Voter ID card ka duh a, a neih theih em?
Chhanna : Sipaia tang tan a hranpain Electoral Roll siam a ni a, Service Roll tih a ni. Electoral Roll pangngaia awm tur chuan pension hunah, pension lehkhate nen form 6 hmangin inthun luh dil tur a ni. Sipaia tanglai, service voter-te hnenah Voter ID Card pekchhuah a ni lo. Sipai tanna hmun/post-ah chu hmun chu hmun ralmuang anih a, rei tawk fang chu hmuna khawsa tawh i nih bawk chuan general voter anga electoral roll a awm i dil thei a, general voter anga ziahluh i nih chuan Voter ID card i nei thei.
Zawhna : Electoral Roll chungchang hi a kalphung leh kaihhruaina dan awm angte awlsam takin engtin nge ka hmuh theih ang ?
Chhanna :District Election Office/ Election Branch atangin emaw, Election Commission of India website atangin emaw awlsamtein i hmu thei ang.
Zawhna : Mobile Application leh Online system-in Electoral Roll a inthun/paih/siamthat ngai angte form a thehluh theih em ?
Chhanna :Hei hi buatsaih mek a ni. Rei loah hman a ni ang. National Voters Service portal atangin leh mobile application hmangin online system-in form hi khawi hmun atang pawhin a thehluh theih a ni ang. Electoral Roll a inthun, paih, siamthat hi online system a kalpui tum mek a ni.
Zawhna :India khua leh tui ni lo te tan electoral roll ah a inziah luh theih em?
Chhanna :Theih loh. India khua leh tui ni thin, tuna ram dang khua leh tui nihna nei tawhte pawh electoral roll-ah awm theih a ni lo.
Zawhna : India khua leh tui ram danga awmte tan electoral roll-ah inthun theih a ni em?
Chhanna : Aw, a inthun theih. Representation of People Act, 1950 Section 20A a mi, Representation of the People (Amendment) Act, 2010 in a sawi angin India khua leh tui dik tak ram danga khawsate tan electoral roll-ah inthun theih a ni. An awmna ramah khua leh tui nihna erawh an nei tur a ni lo.
Zawhna : Form-6 hi eng dilna ber nge?
Chhanna : Electoral Roll a inthun dilna leh Assembly Constituency pakhat atanga Contituency danga insawn dilna form a ni.
Zawhna : Form-7 hi eng dilna atana hman tur nge?
Chhanna :Electoral Roll atanga hming chuang paih dilna form a ni. (Mitthi, pem, Roll a awm duh lo, etc.)
Zawhna : Form-8 hi eng dilna atana hman tur nge?
Chhanna :Electoral Roll a hming leh chanchin dang diklo siamthat dilna.
Zawhna : Form-8A hi eng dilna form nge?
Chhanna : Assembly Constituency pakhat chhunga polling station danga insawn dilna form a ni.
