Ramchhung hmun dangte rualin vawiin khan Government Vengthlang Middle School, Champhaiah Zirtirtute Ni vawi 57-na hman a ni a. He hunah hian Champhai Bawrhsap Dr. Naveen Aggarwal, IAS chu khuallian a ni a, Dr. Lallawmkima DIPRO Champhai chu khualzahahawm a ni.
Khuallian District Bawrhsap chuan Zirtirtute Ni pualin District chhunga Zirtirtute chibai a buk a. Ram leh hnam dinchhuahna kawnga Zirtirtute hnathawh leh inpekna chu a fakawm hle a ni, a ti a. Zirlaite chu Sap tawng zir kawngah tan la tur leh thiam tur chuan tihsual palh pawh zak lo turin a fuih a. Zirtirtuten Class Work leh Home Work an pekte pawh hmaih lova a hun taka ti thin tura chahin, thiamloh leh hriatfiah duh an neih reng rengte chu zawt hreh lo tur leh internet rawnna chang hre turin a chah a. Zirlaibu chhung leh thilthleng thenkhatte hriat chian leh zualna turin a huhova sawi khawmna group discussion nei tam tura chahin, zirlai mai piah lamah chanchin thar ber berte ngaihven thin bawk turin a chah a. Zirlai naupangte chu ngaihsan zawng leh mihlawhtlingte nun atanga zirtur tha awmte zirchianga, chutiang mi anga hlawhtlin tum thin turin a chah bawk a. Zirlai leh Zirtirtute chu Teachers’ Day hlimawm tak hmang turin duhsakna a hlan a ni.
He huna khualzahawm Dr Lallawmkima, DIPRO Champhai chuan Zirtirtute chu nu leh pa te ang chiaha mihring puitling chherchhuah kawnga mi pawimawh tak an ni, a ti a. Zirlai naupangte chu Zirtirtute thu zawm a, taima taka mahni zirlai theuhah tanlakna chang hre turin a fuih a. Zirtirtute Ni hun hlimawm leh nuam tak hmang turin duhsakna a hlan a ni.
He hun hi Pi V.L Rochhari, Headmistress, Govt. Vengthlang M/S, Champhai chuan kaihruaiin District Bawrhsap uapna hnuaia hun hman ani thei chu lawmawm a tih thu a sawi a. Zirlaite chu Dr. S. Radhakrishnana nun atanga zirtur awmte hre renga, retheihna leh harsatna hneha hlawhtlinna chang tum theuh turin a fuih a. Pu H.Lalhruaitluanga, Teacher-in Teachers’ Day puala Education Minister thuchah a chhiarchhuak a. Pi Lalsiamliani, Teacher-in Dr.Sarvepalli Radhakrishnan a chanchin tlangpui a tarlang a, Pu C.Lalhrilliana, Teacher-in Teachers’ Day puala District Commissioner thuchah a chhiarchhuak bawk a ni.
Vawiin Teachers’ Day pual hian Zirlai naupangten Zai, Lam, Custome parade leh Fashion show-te hmangin kalkhawmte an tihlim a. Zirtirtute hnenah Zirlai naupangten thilpek an hlan bawk a. Teachers’ Day pualin chhun chaw tuihnai tak an kil nghal a ni. Govt. Vengthlang Middle School, Champhai hi kum 1962 a din a ni a, tun dinhmunah Zirlai 144 leh Zirtirtu 12 awm mekin SSA hnuaia Model School atana thlan a ni.
Vawiin vek hian Teachers’ Day 2018 pualin District Level Teachers’ Day Celebration Commiitte thurel bawhzuiin member-ten School hrang hrangah insemdarhin hetiang hian Zirtirtute Ni hi an hmanpui a ni.
